БИШКЕК, 18-окт. — Sputnik. Президент Сооронбай Жээнбеков Токтогул ГЭСин реконструкциялоонун үч фазасы тең аяктаганда, анын иштөө мөөнөтү 35-40 жылга чейин узара турганын айтты. Бул туурасында президенттин маалымат кызматынан билдиришти.
Бүгүн, 18-октябрда, өлкө башчы Жалал-Абад облусуна болгон эки күндүк иш сапарынын алкагында Токтогул ГЭСин оңдоп-түзөө иштери менен таанышты.
Жээнбеков Токтогул ГЭСи эң ири жана маанилүү электр станциясы экендигин белгилеп, аны реконструкциялоо маанилүү экендигин белгилеген. Жаңылоо үч фазадан турарын айткан. Биринчи фазасын ишке ашыруу 2017-жылдын май айында башталган.
"Мен премьер-министр катары келип, бул иштерге старт берүүгө катышкам. Бүгүн биринчи фазага белгиленген иштер ийгиликтүү аяктап, кайрадан майрамдык маанайда жолугуп жатабыз. Ал эми долбоордун экинчи жана үчүнчү фазаларында станциянын төрт гидроагрегаты тең кезеги менен алмаштырылат. Натыйжада Токтогул ГЭСинин кубаттуулугу 240 мегаваттка өсөт. Бул долбоор — Камбар-Ата-2 ГЭСине тете дагы бир жаңы ГЭСти куруу менен барабар десек болот. Кудай буйруса, ГЭСтин иштөө мөөнөтү 35-40 жылга узарат", — деди Жээнбеков.
Гидроагрегаттарды алмаштыруу 2023-жылга чейин аяктайт. Президент Токтогул ГЭСин калыбына келтирүү менен катар башка электр станцияларды реконструкциялоо иштери жүрүп жаткандыгын кошумчалаган.
Биздин Telegram-каналга жазылыңыз.
