БИШКЕК, 15-сен. — Sputnik. Ош шаарынын Манас-Ата кичирайонуна заманбап спорт комплекси салынууда. Бул тууралуу калаа мэриясынан билдиришти.
Маалыматка караганда, курулуш иштерин 31-декабрга чейин толугу менен бүтүрүү пландалууда. Азыркы тапта 50 пайызы курулуп бүтүп калды.
"Спорт комплексинде волейбол, баскетбол, бокс, күрөш, теннис оюндары өтүүчү залдар болот. Көрүүчүлөр үчүн да 200дөй орундук коюлуп, спорттук мелдештердин өтүүсүнө шарт түзүлөт. Жанына кичи футбол аянтчасы да салынат. Залдардан тышкары жуунучу жайлар, фитнес, балдар ойноочу аянтча курулуп, айланасы жашылдандырылат", — деп билдиришти мэриядан.
Эң чоң спорт комплексинин курулушун Иран Ислам Республикасы каржылап жатат. Шаар бийлиги жарым гектар жер бөлүп берген.
Ушул жылдын 28-июнунда шаар мэри Таалайбек Сарыбашов комплекстин курулушуна капсула салган. Иштин сапаттуу жасалышын мэрия көзөмөл кылууда.
