БИШКЕК, 6-сен. — Sputnik. Былтыр мамлекеттик бюджетке киргизилген жеңилдиктерден улам 20 миллиард сомдук салык чогулбай калган. Бул тууралуу Мамлекеттик салык кызматы "2020-2022-жылдарга карата салык чогултуу" долбоорун сунуштап жатканда белгилүү болду.
Маалымат 2020-жылга карата республикалык бюджеттин жана 2021-2022-жылга карата божомолу боюнча долбоорду коомдук угууга алып чыкканда айтылган.
"Бюджеттин киреше бөлүгүн аткарууга салык боюнча берилген жеңилдиктер терс таасирин тийгизет. Мындан улам 2018-жылы мамлекеттик бюджет 19 миллиард 813 миллион сомдук жоготууга учураган. Бул — ИДПнын 3,6 пайызы. 2017-жылга салыштырмалуу былтыр чогулбай калган салыктын өлчөмү 440 миллион сомго көбөйгөн", — дешти кызматтан.
Кайсы жеңилдиктерден улам акча түшпөй калган:
- Айыл чарба продукциясын сатуудан түшкөн киреше салыгынан бошотуу — 5 миллиард 840 миллион сом;
- сатуудан түшкөн салыктан бошотуу — 4 миллиард 542 миллион сом;
- финансы кызматтарынын кошумча нарк салыгынан бошотулушу — 822 миллион сом;
- дары-дармектердин кошумча нарк салыгынан бошотулушу — 305 миллион сом.
