БИШКЕК, 1-сен. — Sputnik. Ысык-Көлдө жоголгон Орус-кыргыз өнүктүрүү фондусунун төрагасы Эркин Асрандиевди кайык менен коштоп жүргөн киши табылды. Бул тууралуу ӨКМ билдирди.
Белгилей кетсек, Асрандиевдин тууганы 31-августта саат 18:00дөр чамасында көлдө эки метрге жеткен толкун болгондон кийин аны таппай калышканын айткан. Анын жанында коштоп жүргөн кайык бар болчу. Өзү буёкту байланып сүзүп бараткан.
Катуу толкун болгондо кайыктагы киши менен да байланыш үзүлүп калган.
"Жанында коштоп жүргөн киши табылды. Акыркы маалыматтарга караганда, Эркин Асрандиевдин жанында сыңар калак менен айдалуучу, бир кишилик жеңил кайык (байдарка) менен коштоп жүргөн киши тирүү табылган. Анын айтымында, Асрандиев жээкти көздөй сүзүп кетиши мүмкүн. Издөө иштери уланууда", — деп билдирди ӨКМ.
Эркин Асрандиев Чырпыкты айылынан Кара-Талааны көздөй сүзүп баратып Тору-Айгыр айылына келгенде жоголуп кеткен. Башкача айтканда, ал Ысык-Көлдүн түндүгүнөн түштүк тарабына сүзүп өтүүгө белсенген.
