БИШКЕК, 31-авг. — Sputnik. Президент Сооронбай Жээнбеков бүгүн, 31-августта, Бишкек шаарынын борбордук "Ала-Тоо" аянтында кыргызстандыктарды Эгемендик күнү менен куттуктады. Бул тууралуу мамлекет башчысынын маалымат кызматы билдирди.
Ал куттуктоосунда эркиндик — ата-бабалардын каны менен кошо айланып, жаны менен кошо жашаган, муундан муунга жеткен улуу дөөлөт экенин белгиледи.
"Жыйырма сегиз жыл мурда колго тийген Көз карандысыздык — Жараткандын буйругу менен азыркы муундун энчисине, биздин заманга туш келди. Ошондуктан бүгүнкү эгемендик — биздин гана энчибиз эмес. Бул — ата-бабалардын кылымдар бою төгүлгөн канынын, энелердин жүз жылдар бою тамган көз жашынын баасы. Түмөн муундардын тынбаган күрөшүнүн натыйжасы. Бабалардын бизге калтырган аманаты, биз урпактарга жеткире турган милдет", — деди ал.
Жээнбеков андан сырткары эгемендиктин, мамлекеттин ээси — эл экенине токтолду.
"Буга чейин башталып, саясий себептер менен солгундап калган реформалар кайра жанданат. Элдин үнүн угуп, журттун талабын аткаруу үчүн, жүрүп жаткан реформаларга жаңы дем беребиз. Сот-укуктук адилеттигин, мамлекеттик башкаруунун ачыктыгын, аймактардын өнүгүүсүн, өлкөнү санариптештирүүнү камсыз кылууда конкреттүү жыйынтыктарга жетебиз", — деди ал.
Президент өлкөдөгү коррупция маселесине да токтолуп, ал улуттук көйгөйгө айланганын белгиледи.
"Бийлик таза болсо эл аны дайыма колдойт. Тилекке каршы, чейрек кылым ичинде, бийлик бутактарындагы коррупция — улуттук трагедияга тете көйгөй болуп калды. Бийлик — элге кызмат кылуунун, өлкөнү адилет башкаруунун эмес, байлык жыйноонун булагына айланган. Таза, абийирдүү бийликти бышыктап, мамлекеттик бийликтин таза болушун камсыз кылуу зарыл", — деди Жээнбеков.
Мамлекет башчысы андан сырткары бийлик өзү таза болбой туруп, тазалыкты башкалардан талап кыла албай турганын айтты.
