Сурма жасатууну каалаган кыз-келиндерден күйөөсүнүн макулдугун талап кылабыз. Анткени операциядан кийин үй-бүлөдө ызы-чуу чыкпай, тынч болсо аялдын калыбына келүү процесси да ойдогудай өтөт. Бул тууралуу Султан Тукешов Sputnik Кыргызстан радиосунун таңкы эфиринде маек куруп жатып билдирди.
Анын айтымында, айрым учурларда сурма жасатууну каалап, бул үчүн күйөөсү менен уруша кеткен аялдар кездешет.
"Бир ирет мага соцтармактан бир келин кайрылды. Ал сурма жасатуу үчүн күйөөсү менен уруша кеткенин, бир айга чукул убакыт элдешпестигин айтып, ушул мөөнөттө жасап берүүнү суранды. Албетте, биз мындай сунуштардан баш тартабыз. Анткени ага чейин бизге кайрылган келиндин жолдошу каршы эместигин билдирип, бирок мындан ары операцияга келген аялдардын күйөөлөрүнөн бир ооз сурап коюшубузду сунуштаган. Анын сунушун кабыл алып, биз сурма жасатам деп келген кыз-келиндер толтурчу документтерге сөзсүз түрдө күйөөсүнүн макулдугун киргизгенбиз. Бул үй-бүлөдөгү тынчтыкты сактап, кардар сарсанаа болбой операциядан соң бат калыбына келишин шарттайт", — деди Тукешов.
Ал сурма жасатуунун наркы 250-500 долларды түзүп, көздүн көрүүсүнө зыяны жоктугун кошумчалады.
