БИШКЕК, 13-авг. — Sputnik. Кыргызстанда түндө болгон жер титирөөнүн күчү очогунда 6 баллга жеткенини ӨКМдин маалымат кызматы кабарлады.
Сейсмология институтунун маалыматы боюнча, жер 12-августта 23:14тө силкинген. Анын очогу Жалал-Абаддан чыгышка карай 20 чакырым алыстыкта жайгашкан.
Калк жашаган аймактардын ичинен Тосой, Ничке-Сай, Заргер, Кыргызстан, Кайрат, Жийде, Ак-Терек айылдарында жер титирөөнүн күчү 6 баллга жетсе, Ор-Казган, Таш-Купыр, Ара-Көл, Салам-Алик, Эркин-Тоо, Красный Маяк, Жыланды, Шоро-Башат, Мырзаке айылдарында жана Өзгөн шаарында 5 балл болгон.
Көк-Жаңгак, Жалал-Абад, Кара-Суу шаарларында жана Сузак, Куршаб, Калмак, Кырчын айылдарында жер титирөөнүн күчү 4 баллды көрсөткөн. Ош, Кочкор-Ата шаарларында жана Масы, Казарман айылдарында күчү 3 балл болуп сезилген.
