БИШКЕК, 13-авг. — Sputnik. Кой-Таш айылындагы чабуул учурунда каза тапкан "Альфанын" кызматкерине мурдагы президент Алмазбек Атамбаев тарабынан чыгарылган ок тийген болушу мүмкүн. Бул тууралуу УКМКнын башчысы Орозбек Опумбаев маалымат жыйын учурунда билдирди.
"Алты жолу атылган ок боюнча Атамбаевдин айткандары тастыкталды. Биринчи ок Үсөн Ниязбековго тийиш мүмкүн. Анын артында төрт баласы калды. Эң кичүүсү 1,5 жашта. Ниязбековду жүрөккө атышкан. Ага-лейтенант Ж.У. дагы ок жеп, көзү агып калды. М.Б. аттуу майордун сол далысына, И.Б. аттуу лейтенанттын төшүнө, В.А. аттуу подполковниктин ичине, С.С. аттуу подполковниктин далысынын астына ок тийген. Тергөө мунун баарын укуктук талаада далилдейт", — деди Опумбаев.
Эртеси, 8-августта, операцияны ИИМ жүргүзүп, сүйлөшүүлөрдөн кийин Атамбаев багынып берген. Биринчи Май райондук соту анын баш коргоо чарасын тандап, 26-августка чейин камакта калтырды. Мындан сырткары, бир нече тарапташы камалып, суракка чакырылууда.