Өлкөдөгү мөңгүлөрдүн 70 пайызы Ысык-Көл облусунда жайгашкан. Бул тууралуу Рысбек Сатылканов Sputnik Кыргызстан радиосунун эфиринде маек куруп жатып айтты.
Анын айтымында, окумуштуу Владимир Романовскийдин изилдөөсү боюнча эгер көлгө куйчу суудан сугатка пайдаланылбаса, анда Ысык-Көл 1618 метрге көтөрүлмөк. Анын учурдагы тереңдиги 1607 метрди түзөт.
"Өлкө аймагындагы мөңгүлөрдүн 70 пайызга жакыны Ысык-Көл облусунда жайгашкан. Алардан Нарын, Тарим, Сары-Жаз суулары пайда болуп, кошуна мамлекеттерге агып чыгып турат. Ал эми күңгөй тескейинде жайгашкан мөңгүлөр жергиликтүү калктын муктаждыгына жумшалып, көлгө куят. Бирок айдоо жерлерди сугарууга суу эффективдүү пайдаланылбагандыктан, биз жыл сайын чоң өлчөмдөгү мөңгү сууларын жоготуп жатабыз. Жыйынтыгында көлгө суу көп куйбай, ал азаюуда. Окумуштуулар эгер көлгө куйган сууларга тийбесек бүгүнкү күндө ал болжол менен Балыкчыдагы Көтмалды босогосуна жакындамак деп айтышкан. Анын тереңдиги 1620 метр. Андыктан учурда өкмөттүн алдында Ысык-Көл облусундагы сугат жерлерде сугаруунун жаңы ыкмаларына өтүү менен көлдү сактап калуу же башка жолдорун издөө турат", — деди Сатылканов.
Ал кыргыз окумуштуулары бул багыттагы илимий иштерди жасоону жана өкмөткө сунуштоону уланта беришерин кошумчалады.
