БИШКЕК, 8-авг. — Sputnik. Кой-Таш айылына келген жүздөгөн милиция кызматкерлери тобу менен кайтып жатышат. Бул тууралуу кабарчыбыз жеринен билдирди.
Укук коргоо органдарынын өкүлдөрү Алмазбек Атамбаевдин үйүнөн 2-3 чакырым алыс жерде чогулушкан. Алар элди Атамбаевдин үйү тарапка өткөрбөй тосуп турушкан болчу.
Видеодон милиция кызматкерлери токтоп турган автобусту көздөй кетип баратканын көрүүгө болот.
Учурда жол ачык, жай жарандар машинасы менен ээн-эркин өтүшүүдө.
Өз кезегинде Ички иштер министрлигинин маалымат кызматы да милиционерлер Кой-Таш айылынан кеткенин айтып, мындай кадам жай тургундар менен кагылышууга барбоо максатында жасалганын билдирди.
"Учурда абал туруктуу, бардыгы милициянын көзөмөлүндө", — деп айтылат маалыматта.
Саламаттыкты сактоо министрлигинин берген акыркы маалыматы боюнча, жаракат алгандардын саны 45ке жетти.
