БИШКЕК, 10-июн. — Sputnik. Президент Сооронбай Жээнбеков Казакстандын башчысы Касым-Жомарт Токаев менен телефон аркылуу сүйлөштү. Бул тууралуу президенттин маалымат кызматы билдирди.
Ага ылайык, Жээнбеков боордош Казакстандын эли үчүн Токаевдин президент болуп шайланышы маанилүү жана жооптуу тандоо болгонун белгиледи. Муну менен бирге мындан аркы туруктуу жана ар тараптуу өнүгүүсүнө өбөлгө түзөрүнө ишенерин айткан.
"Кыргыз-казак кызматташтыгын кеңейтүү максатында Сооронбай Жээнбеков Касым-Жомарт Токаевди Кыргызстанга расмий визит менен келүүгө чакырды", — деп айтылат маалыматта.
Эске салсак, 10-июнда Казакстанда мөөнөтүнөн мурда президенттик шайлоо өтүп, алдын ала жыйынтык боюнча учурдагы президент Касым-Жомарт Токаев шайлоочулардын басымдуу бөлүгүнүн добушуна ээ болгон.
