БИШКЕК, 30-май — Sputnik. Кыргызстанда туризмди өнүктүрүү максатында бир катар жаңы аба каттамдары ачылат. Бул тууралуу Транспорт жана жолдор министрлигинен кабарлашты.
Маалыматка караганда, Qazaq Air авиакомпаниясы 2019-жылдын 7-июнунан тартып Алматы — Ош — Алматы багытында жумасына эки жолу — жума жана жекшемби күндөрү каттай баштайт.
Бул авиакомпания 5-апрелден тартып Алматы — Бишкек — Алматы каттамы боюнча жумасына эки ирет — жума жана жекшемби күндөрү уча баштаган.
"Өзбек аба каттамдары" авиакомпаниясы 27-июндан баштап Ташкент — Тамчы — Ташкент каттамын ачат. Учактар чартердик негизде жекшемби күндөрү каттап турат.
"Атлас Глобал" авиакомпаниясы тарабынан 10-июндан тарта жайкы сезонго карата Анталия — Бишкек — Анталия каттамы ишке кирип, жумасына эки жолу — жума жана жекшемби күндөрү каттайт.
Мындан тышкары, 22-июнда "Сибирь" авиакомпаниясы Новосибирск — Тамчы — Новосибирск багытында жумасына бир жолу — жекшемби күнү каттай турган болду.
Tez Jet авиакомпаниясы 28-июндан баштап жумасына төрт жолу учкан Ош — Тамчы — Ош каттамын жандандырат.
Ал эми июнда "Түрк аба каттамдары" авиакомпаниясы Анталия — Бишкек — Анталия багытында жумасына бир жолу — ишемби күнү учкан каттамды ишке ашырат.
