Бүгүн, 20-апрелде, Кыргызстандан чыккан Антонина Шевченко тарыхка кирет. Ал UFC уюмунун Россиядагы спорттук иш-чараларынын тарыхында аялдар арасындагы алгачкы мелдеште беттешет. Таймаштын алдында Sputnik Кыргызстандын кабарчысы Алексей Стефанов Санкт-Петербургда спортчу кыз менен жолугуп, учкай маектешти.
"Бишкекте Валентинаны кош колдоп тосуп алышкан күйөрмандарга ыраазычылык билдирем. Бул мелдешке даярданууга Таиландга келгендигим үчүн Кыргызстанга бара албай калдым, бирок ага карабастан, мекендештердин колдоосу жана элдин арзуусу туюлуп турду. Күйөрмандар мага: "Антонина, келип кет! Сен эмнеге келген жоксуң?" – деп жазып жатышты. Машыгууну таштап кете албадым. Бирок кыялымда Бишкекте "жүрдүм", сиздердин колдооңуздар, жылуу мамилеңиздерди сездим. Бул үчүн ар бириңиздерге чоң ырахмат!" – деп кайрылат Антонина өз мекендештерине.
Америкалык Роксанн Модаффери менен саналуу сааттардан кийин боло турган беттешке даярдык Пхукеттеги Tiger Muay Thai лагеринде өттү. Ал жакка Антонина өзүнүн сиңдиси Валентина жана машыктыруучусу Павел Федотов менен барган. Валентина ортодо Бишкекке барып келүүгө үлгүрүп, кыргызстандыктардын терең арзуусун сезип келсе, Антонина тыным албай машыкты.
Посмотреть эту публикацию в Instagram
"Лагерде баарына даярдандык. Бул таймаш мен үчүн өтө маанилүү, татаал, атаандашым — олуттуу. Ошондуктан ар кыл кырдаалды эске алуу менен тер төгүп машыктык. Атаандашым күрөштө күчтүү, бирок күрөшүп гана тим калбай, сокку урган техникамды да жакшыртып, курчутууга тийиш элем. Соңку аптадагы даярдык абдан катуу өттү", — деди Антонина.
Антонинага көз сала келгенде мырзалар татына, назик бир кыздын образын көрөт, анан ал рингге атаандаштары менен беттешке чыкканда айран-таң калышат.
Посмотреть эту публикацию в Instagram
"ММАнын (аралаш мушташ өнөрлөрү) аялдар арасындагы мелдештери эркектердин таймашынан эч айырмаланбайт. Кыздардын беттештерин гана жактырган көрүүчүлөр бар. Алар бир караганда сулуу, назик жана алсыздай болгону менен рингде кулпура түшөт. Элдин алдында кармашып, чарчоосун жеңип, аялдын күчүн жана ага таандык мүнөзүн көргүсү келгендерди кайдыгер калтырбайт", — деп эсептейт Антонина.
Букмекерлердин божомолунда, спортчубуздун жеңишке шансы аз, бирок ага Антонина эч терикпей: "Ал жөнүндө ойлогум келбейт, жеңишти гана көздөп турам" деди. Бул туурасында Антонина Санкт-Петербургдагы ачык машыгууда да билдирип, питерликтердин меймандостугуна ырахматын айткан.
Посмотреть эту публикацию в Instagram
Санкт-Петербургга Антонина машыктыруучусу Павел Федотов, апасы Елена жана сиңдиси Валентина менен келди. Башта бул калаага кышында гана келчү экен. Азыр көктөм, күн жылуу, эже-сиңди спортчулар жана алардын устаттары мындай кооздукту көрүү мүмкүнчүлүгүн колдон чыгаргысы келбеген өңдүү.
"Петропавловск чебин кыдырдык, Исаакиев чиркөөсүн көрдүк. Неваны жээктей сейилдегим келчү. Ал кыялды да ишке ашырдык! Бирок машыгуулар башталып калгандыктан, албетте, дагы көп жерлерге бара албай калдык. Мелдештен соң колдон келсе Питерде дагы бир нече күн туруу пландарым бар. Эми көрөбүз го", — деди Антонина.
Посмотреть эту публикацию в Instagram
Санкт-Петербургду канчалык жактырып турганы менен ал баарынан да Бишкек шаарын көп сагынат.
"Кыргызстан — менин мекеним. Ата-энем да, өзүм да төрөлүп-өсүп, спортчу катары калыптанган өлкөм. Аталган мамлекеттин туусун алып жүргөнүм — мен үчүн, албетте, чоң сыймык жана жоопкерчилик. Мындан ары да Кыргызстандын даңкын чыгарып, даңазалай берүүгө колумдан келишинче аракет кылам", — деди Антонина.
Эже-сиңди Шевченколор Америкадан да Кыргызстанды эске салган бир жерди таап алышкан.
Посмотреть эту публикацию в Instagram
Эске салсак, Антонина Шевченконун дүйнөлүк деңгээлдеги беттешинин дебюту өткөн жылдын декабрь айында болгон. Ал түштүккореялык Жи Йон Кимди жеңип, биринчи ийгилигин жараткан.
