БИШКЕК, 28-мар. — Sputnik. Дүйнөнүн мыкты мугалими аталган кениялык кечил-францискан Питер Табичи бир миллион доллар сый акысына өзү иштеген мектепке жабдуу алып, жергиликтүү тургундарга жардам берерин айтты. Бул тууралуу РИА Новости жазды.
"Биздин мектепте заманбап лаборатория болушун каалайм. Ошондой эле жергиликтүү тургундарга жардам бере турчу долбоор жасагым келет. Мисалы, үйдүн жанына жей турган өсүмдүктөрдү өстүрсөк болот. Мен төрөлгөн жерде жакырчылык күч, тамак-аш өтө аз", — деди Табичи.
36 жаштагы мугалим Кениядагы айылдардын бириндеги орто мектепте табигый илимдер боюнча сабак берет. Алардын окуу борборунда бир гана компьютер бар, ал эми бир мугалимге 58 окуучу туура келет.
Табичи мурда жеке престиждүү мектепте иштегенин, бирок кийин жашоо-турмушу начар балдарга сабак өтүүнү чечкенин айтты. Жети жыл мурун ал кечил болуп, тапкан каражатынын 80 пайызын жардамга муктаждарга бере баштаган.
"Дүйнөдөгү эң мыкты мугалимди" индиялык ишкер Санни Варкейдин кайрымдуулук уюму 2015-жылдан бери тандап келет.
Сый акынын берилиши Бириккен Араб Эмирлигинин премьер-министри жана вице-президенти, Дубайдын башкаруучусу шейх Мухаммед бен Рашид Аль Мактум тарабынан көзөмөлдөнөт.
Индиядан чыккан ишкер Санни Варкей Жакынкы Чыгышта GEMS Education аттуу жеке бала бакча жана мектептердин ири түйүнүн ачкан.
