БИШКЕК, 20-мар. — Sputnik. Кыргызстандык жаштар Военно-Антоновка айылындагы балдар үйүнө барып Нооруз майрамын өткөрүп келишти. Кайрымдуулук иш-чараны "Илек-Илек жаштары" коомдук бирикмеси уюштурган.
Маалыматка ылайык, демилгечи жаштар балдар үйүнүн тарбиялануучулары менен кошо түнү бою сүмөлөк кайнатып майрамды шаңдуу өткөрүшкөн.
"Балдарга дасторкон жайып, ошол жерде улуттук тамактарды жасап бердик. Кыздар уз-черберчилик, жаратмандык өнөрлөрүн, балдар кыргыз улуттук оюндарын көргөзүү менен окуучулардын арасында мелдеш уюштурулду. Анын алкагында балдарга түрдүү белектер тапшырылды. Шоу-бизнес өкүлдөрүнүн катышуусу менен концерт болгон. Соңунда мультфильм да көрсөтүлдү", — деп айтылат маалыматта.
Уюштуруучулардын айтымында, кайрымдуулук иш-чаранын негизги максаты — балдардын кубаныч-кайгысын тең бөлүшүү, аларга жылмаюу жана майрам тартуулоо. Ошондой эле жаштардын демилгесин бир топ демөөрчүлөр колдоого алганы айтылат.
