Профессионал эмес, волейбол сүйүүчү кыз-келиндер арасында мелдеш өтөт. Максаты — аялдардын спортко болгон кызыгуусун пайда кылуу жана арттыруу. Бул тууралуу Элиза Асилбекова Sputnik Кыргызстан радиосунун таңкы эфиринде маек куруп жатып билдирди.
Анын айтымында, аталган саамалыкта сегиз команда ат салышмакчы.
"Ушул жылдын башында "Дилгир" кыз-келиндер арасындагы волейбол лигасы түзүлгөн. 6-апрелде өтө турган мелдешти КРдин Волейбол федерациясы менен бирге уюштуруп жатабыз. Максатыбыз — аялдарды спорт менен алектенүүгө чакыруу жана кызыгуусун арттыруу. Волейбол оңой оюн болуп эсептелгени менен аялдын ден соолугуна абдан пайдалуу. Оюнга спорттун аталган түрүнө кызыккан, 30-41 жаштагы профессионал эмес кыз-келиндер тандалууда. Жалпы сегиз команданын таймашуусу күтүлүп жатат", — деди Асилбекова.
Ал бул саамалыктын деңгээлин демөөрчүлөрдүн колдоосу менен эл аралык турнирлердей өткөрүүгө аракет жасашарын кошумчалады.
