БИШКЕК, 13-мар. — Sputnik. Жогорку Кеңештин депутаты Исхак Масалиев ИИМдин ички аскерлерине ашыкча көп укук берилип кеткенин парламенттин жалпы жыйынында билдирди.
Бүгүн депутаттар "Кыргыз Республикасынын Ички иштер министрлигинин Ички аскерлери жөнүндө" мыйзамдын долбоорун биринчи окууда карашты.
Масалиев ички аскерлер эмне себептен ИИМден алынганын сурады.
Ички иштер министринин орун басары Курсан Асанов ички аскерлер 2014-жылы аскердик реформанын алкагында Улуттук гвардиянын курамына өткөнүн айтты.
Депутат ошондой эле учурунда кабыл алынган чечим туура болгонбу деп суроо салды.
Асанов ага түшүндүрмө бере албай турганын, жакында ички аскерлерди кайтадан ИИМдин курамына алуу боюнча буйругу чыкканын белгиледи.
Депутат Конституциянын 14-беренесинин 3-пунктунда Кыргыз Республикасынын Куралдуу Күчтөрүн мамлекеттин ички саясий маселелерин чечүү үчүн пайдаланууга тыюу салынат деп жазылып турганын айтып, сунушталып жаткан мыйзам долбоорунда ички аскерлерге саясий айрым иш-аракеттерди коргоо, көзөмөлдөө функциясы берилгенин кошумчалады.
"Эл топтолгон жерде кишилердин документтерин текшерүүгө укук берилген. Ал Конституцияга туура келеби?" — деп суроо салды Масалиев.
Курсан Асанов депутаттардын суроолоруна жооп берип жатып, ички аскердин штаттык курамы 2150 киши болорун айтты. Андан сырткары, алар Кыргызстанда маанилүү делген объектилерди — ГЭС, суу сактагычтар жана башкаларды коргой турганын кошумчалады.
Белгилей кетсек, ички аскерлерди ИИМдин курамына берүү боюнча быйыл сентябрь айында президенттин жарлыгы чыккан. Ал эми 5-мартта ИИМдин ички аскеринин кол башчысы, полковник Исламбек Кенжекулов өздүк курамга тааныштырылган.
