БИШКЕК, 27-фев. — Sputnik. Борбор шаардагы мектептердин мугалимдери жана Өспүрүмдөр менен иштөө боюнча инспекциянын кызматкерлери ата-энелерге окуучулар арасында тараган кооптуу оюн туурасында эскертүүдө. Бул туурасында Sputnik Кыргызстан агенттигине окурман кабарлады.
"Оюн "48 саатка жоголуп кет" деп аталарын билдиришти. Анын тартиби боюнча өспүрүм ата-энеси издөө салыш үчүн телефон аппаратын өчүрүп коюп, эки күнгө жоголуп кетиши керек. Эгерде анын изделип жатканы боюнча маалымат социалдык тармак менен жалпыга маалымдоо каражаттарына чыкса, ага балл кошулат экен", — деп айтып берди ал.
Бишкек шаардык Билим берүү башкармалыгынын жетекчиси Сауле Мейрманова Бишкек шаарында бул боюнча тиешелүү иштер жүрүп жатканын айтты.
Кооптуу оюн туурасындагы маалыматты Бишкек шаардык ички иштер башкармалыгынын коопсуздукту камсыздоо боюнча кызматы да тастыктады. Акыркы учурда өспүрүмдөр арасында жок болуп кетип, кайра эки күндөн кийин табылган учурлар кездешүүдө.
