БИШКЕК, 24-фев — Sputnik. Бишкектеги "Ош" базарынан интернаттан качкан 13 жаштагы Анаркүл Жоошбаева табылганын Sputnik Кыргызстан маалымат агенттигинин кабарчысына Аламүдүн районундагы Таш-Дөбө айылында жайгашкан интернаттан кабарлашты.
Ал 18-февралда эртең менен мектеп-интернаттан чыккан боюнча кайрылып келген эмес.
Милициядан кабарлашкандай, кыз буга чейин Аламүдүн районуна караштуу Байтик айылындагы үйүнөн качып чыгып, эки күндөн кийин табылган.
23-февралда болжол менен 11:30да өспүрүм "Ош" базарынан табылган. Алар кыздын сүрөтүн өткөн-кеткендерге, сатуучуларга көрсөтүп жардам сураган, арасында тааныгандары да болгон.
Биринчи күнгө чейин кыз окуткан мугалиминин үйүндө жашап турат.
Интернаттын кызматкеринин айтымында, кыздын жашай турган үйү жок, атасы каза тапкан. Энесинин туугандары каралашпайт. Кыз мектеп-интернатта 1,5 жылдан бери жашап, окуп келет.
Алгачкы ирет ал таятасы мончого алып барган кезде качып кеткенин Sputnik маалымат агенттигине бир тууган эжеси айтып берди.
Таятасы кызды жууна бер деп залга калтырып коюп, өзү достору жана анын балдары менен эркектер залына кирип кеткен. Чыгып небересин таппай калган. Аны чыгыш автовокзалынын аймагынан таап, милицияга өткөрүшкөн.
Кыз азыр түштүк жергесинде жүргөн энесин сагынып, куса болуп жатканын туугандары кошумчалады.
