БИШКЕК, 19-фев. — Sputnik. "Поле чудес" телешоусунун алып баруучусу Леонид Якубович программа тартылып бүткөндөн кийин катышуучулар тарабынан алып келинген тамак-ашты көрүүчүлөргө таратып берүү салтына комментарий берди.
Якубовичтин пикирин "Комсомольская Правда" жазды.
Социалдык тармактын колдонуучулары 15-февралда көрсөтүлгөн оюндун YouTube каналына жарыяланган эпизодуна көңүл бурушкан.
Кадрдан программа бүтөрү менен студияда отурган эл барабандагы дүйүм тамакты талап кеткенин көрүүгө болот.
Интернет колдонуучулар бул көрүнүштү кызуу талкуулашкан. Ал эми Якубович сындап жаткандар орус элинин салтын билбеген адамдар экенин айтты.
"Алар биздин салтты дагы, тилди дагы жакшы билбейт. Россияда кылымдардан бери меймандостук салты сакталып келет. 28-29 жылдан бери "Поле чудестин" катышуучулары түрдүү тамак-аштарды алып келишет. Тартуу иштери аяктагандан кийин барабандын айланасына эл топтошуп программа кандай болгонун талкуулашат, азыктарды жешет. Салтты билбегендер китеп окуп же башкалардан сурап көрсүн. Бизде ушундай сонун салт бар. Мага абдан жагат", — деди алып баруучу.
"Поле чудес" 1990-жылдын 25-октябрынан бери эфирге чыгып келет. Программаны бүгүнкү күнгө чейин "ВИД" телекомпаниясы эфирге даярдайт.
