БИШКЕК, 30-янв. — Sputnik. Нью-Йоркто жергиликтүү миллиардердин үйүндө лифт иштебей калып, пол жуугуч аял ал жакта үч күн отурган. Бул тууралуу New York Times жазды.
53 жаштагы Маритес Фортализа жума күнү инвестор Уоррен Стивенстин үйүн жыйноого барат. Иштеп жүрүп экинчи кабат менен үчүнчү кабаттын ортосуна келгенде лифт токтоп калган.
Бул тууралуу маалымат куткаруучуларга дүйшөмбү күнү эртең менен кожоюндары үйүнө барганда гана жеткен. Аял ооруканага жаткырылган. Дарыгерлердин айтымында, анын каны катып калган. Анткен менен бейтаптын абалы учурда туруктуу.
Маалым болгондой, Фортализа миллиардердин үйүндө 18 жылдан бери иштейт. Ал эми бул үйдөгү лифтти акыркы жолу 2018-жылдын июль айында текшертишкен. Үй ээсине бузулган лифтти тезинен оңдотуу боюнча эскертүү берилди.
