БИШКЕК, 5-янв. — Sputnik. Президенттин аппараты Жогорку Кеңештин экс-депутаты Өмүрбек Текебаевге ырайым кылуу өтүнүчүн карап жатканын өлкө башчынын маалымат катчысы Толгонай Стамалиева билдирди.
Өтүнүч экс-президент Роза Отунбаева тарабынан келтирилген. Анын айтымында, "Текебаевдин иши саясий буйрутма экени башынан эле баарына белгилүү болгон". Демилгени Жогорку Кеңештеги алты фракциянын тең жетекчилери колдоого алган.
Стамалиева өтүнүчтү президенттик аппараттын тийиштүү бөлүмү карап чыккандан кийин кайра атайын комиссия иликтей турганын айтып берди. Анын айтымында, эгер сунуш жеке тараптар тарабынан берилсе, эки жумада, ал эми юридикалык жак демилгелесе, бир айдын ичинде каралат.
Материалдын баарын карап чыккандан кийин комиссия президентке ырайым кылуу боюнча сунуш киргизет же аны четке кагат. Четке кагылган учур тууралуу президент да кабардар болушу зарыл.
Буга чейин президент Сооронбай Жээнбеков маалымат жыйында соттук чечимдерге кийлигишүүгө укугу жок экенин, бирок Текебаев кайрылса ырайым кыла ала турганын айткан. Ал эми абактагы саясатчы ырайым кылууну өтүнбөй турганын билдирген.
Ырайым кылуу процедурасын Sputnik Кыргызстан агенттиги даярдаган материалдан толук билүүгө болот.
