БИШКЕК, 13-дек. — Sputnik. Жогорку Кеңештин экс-депутаты Өмүрбек Бабановдун иши боюнча маселени күн тартибине киргизүүдө талаш-тартыш жаралды.
Депутат Максат Сабиров бүгүнкү күн тартибине саат 11:00гө Өмүрбек Бабановдун иши боюнча тийиштүү укук коргоо органдарын чакыртып, маалыматын угууну сунуштады. Анын айтымында, Бабановдун маселеси боюнча сунуш кечээ, 12-декабрдагы жыйында колдоо тапканы менен убакыт жетпей каралбай калган.
Өз кезегинде төрага Дастан Жумабеков кечээ башка күн тартиби кабыл алынганын, бүгүн башка күн тартиби бекитилиши керектигин эскертти.
Бирок Сабиров буга чейин маанилүү маселелерди кароого убакыт калбай калганда ал кийинки күндүн күн тартибине автоматтык түрдө кирип, депутаттар талкуулап келгенин айтты.
Ал эми депутат Руслан Казакбаев бул жерде чочуй турчу эч нерсе жок экенин, УКМК менен Башкы прокуратураны чакырып жарым саат угуп коюудан эч нерсе болбой турганын белгиледи.
Жыйынтыгында депутат Максат Сабировдун сунушу добушка коюлуп, ал колдоо тапкан жок (23 гана депутат колдоду).
