БИШКЕК, 21-ноя. — Sputnik. "Ата Мекен" фракциясынын лидери Алмамбет Шыкмаматов жаңы ачылган жагдайлардан улам Өмүрбек Текебаевдин иши кайтадан каралышы керектигин маалымат жыйында билдирди.
Анын айтымында, Текебаевдин камалышына эң негизги себеп болгон Леонид Маевскийдин өз өлкөсүндө алдамчылык менен камалышын эске алуу керек. Андыктан азыр беш учур боюнча жаңы жагдайлар ачылды.
"Алардын бири — Текебаев, Чотонов жана Александр Модиндин"Супарада" тамак ичип отурганы. Ал күнү Текебаев бир күн бою жыйында болгон. Ал эми Чотонов тик учак менен Ошко учуп кеткен. Аны Аэроновигация да далилдеп жатат. Чотонов сотто Оштон Исмаил Исаков менен жолукканын айтса да ага ишенген жок. Анан кайдагы бир жалганчыга ишенишет. Бул күнү ал темселеп шаарды кыдырып жүргөн", — деди ал.
Шыкмаматов ошондой эле тергөө жана сот учурунда көптөгөн дал келбестиктер болгонуна карабай сот Текебаевди кармаганга шашканын белгиледи.
"Булардын бардыгы Атамбаевдин президенттик мөөнөтү аяктаганга чейин Текебаев менен Чотоновду камоо, Текебаевди президенттик шайлоого катыштырбай коюу аракеттери болду", — деди фракция лидери.
Андан сырткары, Шыкмаматов Алмазбек Атамбаев жакында берген маегинде Текебаевди каматууга буйрук бергенине өкүнө турганын кыйыр түрдө болсо да моюндаганын айтып, президент Сооронбай Жээнбековдон да Текебаев боюнча пикир билдирип коюуну өтүндү.
Белгилей кетсек, Текебаев Кылмыш-жаза кодексинин коррупция беренеси боюнча айыпталып камакка алынган.
