БИШКЕК, 15-ноя. — Sputnik. Жогорку Кеңештин депутаты Таабалды Тиллаев Баткен облусунун аймагында 27 жылдан бери иштетилбей жаткан кен байлыктары тууралуу маселе көтөрдү.
Учурда парламентарийлер ар кандай маселелерди карап жатат.
Депутаттын айтымында, Баткендеги Шамбесай алтын кени, Бел-Алма көмүр кени, Алтын-Жылга кени толук түрдө иштебей турат.
"Аны жеке ишкерлер алып, 27 жылдан бери бир да иш жасалбай келет. Ушуга чейин кен байлыкты иштете албаган ишкердин бизге эмне кереги бар? Мыйзамды карап чыгыңыздар. Иштете албаса, аны иштетем деген инвесторго беришибиз керек. Баткенде бир дагы кайра иштетүүчү ишкана жок. Андан сырткары, элге бир сотых да суулуу жер тийген эмес. Дыйканчылык кыла алышпайт. Андыктан аларга иш ордун түзүп бергенге аракет кылыш керек", — деди ал.
Депутат ошондой эле Лейлек районунда "Кыргызнефтегаз" ишканасына тиешелүү жерден жылына 1000 тоннадан ашык нефть чыгарын айтып, бирок ал Жалал-Абаддагы Кочкор-Атага ташылып келип, иштетилгенден кийин кайра Тажикстанга сатылып жатканын белгиледи. Андыктан нефть чыккан жерге кайра иштетүүчү чакан ишкана курулса, 100 киши жумуш орду менен камсыз болорун билдирди.
