Улуу манасчы Саякбай Каралаев менен акын, жазуучу Аалы Токомбаевдин күрөшүп жаткан сүрөтү 1950-жылдары Ысык-Көлдө тартылган.
Ал жылдары Кыргызстанга орус акыны Алексей Сурков келип, аны кыргыз интеллигенциясы жылуу тосуп алган.
Ошол учурду адабий сынчы, коомдук ишмер Азиз Салиевдин уулу, режиссер Эркин Салиев мындайча эскерет:
"Атам бул сүрөттүн баянын айтып берген. Ошол жылы жайында Алексей Сурков Кыргызстанга келет. Биздин акын-жазуучуларыбыз сыйлуу конокту тосуп алып, Ысык-Көлгө алып барышкан экен. Алардын арасында акын-жазуучулар Муса Жангазиев, Аалы Токомбаев, Түгөлбай Сыдыкбеков, манасчы Саякбай Каралаев жана Жазуучулар союзунун ошол учурдагы төрагасы, менин атам Азиз Салиев да болгон. Чыгармачыл инсандар жайлоого чыгып, эл аралап, жергиликтүү тургундарга ыр окуп беришчү экен. Анан бир күнү көлгө түшкөнү келип, жээктен Токомбаев менен Каралаев күч сынашып күрөшө кетишсе, сырттан келген Сурков калыстык кылыптыр", — деди Салиев.
Ошондой эле ал жогоруда ысымы аталган инсандар бири-бири менен жылуу мамиледе болуп, жакшы катышкан замандаштар болгондугун кошумчалады.
