Бий мектеби Round Infinity аталышында Бишкектеги Асанбай кичирайонунда жайгашкан. Иш-чаранын ачылышында коомдук активист Үкөй Мураталиева менен хореограф Артур Богомятов танго бийледи.
"Алгач жөн эле бийлеп көрөйүн дедим. Кийинки күндөрү кыймыл-аракеттери жага баштады. Азыр үйрөнгөнүмө төрт айга чукулдап калды. Ушунун баары хореографтардын эмгеги. Баштаган ишти таштабай мындан ары өркүндөтөм ", — деди бийге маашырланган Мураталиева.
Долбоордун жетектиси Айнура Телеушеванын айтымында, майып адамдарга арналган бий студиясы Кыргызстанда алгачкы ирет ачылып жатат. Келечекте бийчилерди эл аралык сынактарга катыштыруу башкы планы экендигин айтып берди.
Ал кошумчалагандай, студияда бийдин бир нече түрүн үйрөнүүгө болот. Мектеп ден соолугунан мүмкүнчүлүгү чектелгендерден сырткары, бардык каалоочуларга ачык.
