Климаттын өзгөрүүсү биринчи кезекте тоолуу өлкөлөргө терс таасирин тийгизет. Бул себептен жаратылыш маселелерин тоо форуму сыяктуу иш-чараларда көтөрүп, ага өзгөчө көңүл буруу шарт. Бул тууралуу Айлана-чөйрөнү коргоо жана токой чарбасы боюнча мамлекеттик агенттиктин астындагы биотүрдүүлүктү сактоо жана өзгөчө корголуучу жаратылыш аймактары департаментинин директорунун орун басары Кумар Мамбеталиев Sputnik Кыргызстан радиосунун таңкы эфиринде маек куруп жатып билдирди.
Анын айтымында, аталган форум Кыргызстан үчүн пайдалуу болуп, анда төрт маселе каралган.
"Баарыңыздарга белгилүү болгондой Кыргызстанда 2002-жыл "Тоо жылы" деп жарыяланып, бир топ иш-чара өткөрүлгөн. Анын ичинен жыйынтыктоочу иш-чара катары Бишкек глобалдык тоо саммити болгон. Ал жерден тоо платформасы кабыл алынып, жылдын аягында БУУнун жыйынында 11-декабрь тоо күнү катары кабыл алынган. Бул демилгенин башаты Кыргызстан десек жаңылышпайбыз. Бул жылы өткөн форумда төрт маселеге көңүл бурулду. Алар: климаттын өзгөрүүсү, инвестиция тартуу, тоолуу экосистеманын жабыркоо абалы жана тажрыйба алмашуу", — деди Мамбеталиев.
Ал быйыл 2018-жылы тоо форуму Кыргызстанда өтүп жатканы кубантаарлык көрүнүш экенин жана буга чейин Латын Америка, Европа, Африка өлкөлөрүндө өтүп келгенин кошумчалады.
