Бурадарды жакшы жаңылык менен баштайлы. Грек-рим күрөшү боюнча кыргызстандык балбан Жоламан Шаршенбеков Венгриянын Будапешт шаарында өтүп жаткан дүйнө чемпионатынын финалына чыкты. Кандай кубанычтуу кабар!
SHARCHENBEKOV (KGZ) through to tomorrow's finals!! pic.twitter.com/otiwgEh44T
— #BudaWrestle2018 (@wrestling) 25 октября 2018 г.
Ээси келсе, бээсин бер. Кечээ парламент Улукбек Кочкоровду Эмгек жана социалдык өнүктүрүү министри ал эми Азамат Жаманкуловду Маданият, маалымат жана туризм министри кызматына бекитти. Эл үчүн иштеген жетекчилерден болсун.
Бирде жигит төө минет, бирде жигит жөө жүрөт дегендей, президенттин жана өкмөттүн иш башкармалыгынын жетекчиси Туруспек Коеналиев кызматынан бошотулду.
Бирөөгө 1000 сом карыз болсок чый-пыйыбыз чыгып, кайтарып бергиче шашабыз. Кандай эле жүрөгү тоо кишилер акча менен ойноп элди алдайт болду экен. Бишкектин акча алмаштырган жайларынын биринде 585 миң жасалма рублди алмаштырып кеткен киши изделүүдө. Шектүү жалпысынан, ал 9 000 долларды "шыпырып" кетиптир дешти.
Шектүү демекчи, салт болуп калган социалдык экспериментти Ошто жасадык. Анда "чөнтөкчү" кол телефон уурдап, келтек жеп кала жаздады.
Кайсы бирин айталы. Суусамырда жолдо баратып эле көз көрүнөө эл тоногон каракчылар кармалды. Алар Бишкектен Ош облусун көздөй бараткан унааны токтотуп, ичиндегилерди курал менен коркутуп, 35 миң сомун карактап кеткен экен, "Перехват" планы жарыяланып милиция кылмышка шектүү деп Таластын үч тургунун кармаптыр. Кино бул жакта калат.
Кыргызстандык авиакомпаниялардын кудайлаткан учактары тууралуу кызыктуу инфографикага да көз чаптырып коюңуздар.
Учак демекчи, учкучтар жүргүнчүлөргө эч качан ачыктабай турган нерселер жөнүндө айтып беришиптир.
Sputnik агенттиги кыздары бар ата-энелер үчүн керектүү материал даярдап, кабарчылар балдар гинекологу менен маектешти. Дарыгер Диля Боромбаева гигиена, кыздардын биринчи айызы жана коркунучтуу илдеттер тууралуу айтып берди.
Валюта наркы. Сомдун баасы долларга карата орто эсеп менен 69.40 (сатып алуу) жана 69.67 (сатуу) сомду түздү.
Мунай баасы. Бишкекте орточо эсеп менен алганда АИ-95 үлгүсүндөгү бензин 46.50 сом, АИ-92 үлгүсүндөгү май 44.00 сом, ал эми дизель майы 46.50 сомдон сатылууда.
Соңку сөз. Кишинин жумшагын киши жейт, жыгачтын жумшагын курт жейт!
Ден соолук тилеп, Таалайгүл Усенбаева.
