БИШКЕК, 24-окт. — Sputnik. "Кыргызаэронавигация" мамлекеттик ишканасынын башкы директорунун орун басары Маматназар Жакыпбаев айдап келе жаткан Toyota Camry унаасын артынан Lexus машинасы сүзгөн. Аткаминер сыртка чыгып, айдоочу менен сүйлөшүүгө аракет кылган, бирок алар кырсык болгон жерден кетип калууга аракеттенишкен. Бул тууралуу Sputnik Кыргызстан агенттигине маркумдун уулу Азирет Жакыпбаев айтып берди.
Эскерте кетсек, каргашалуу окуя 21-октябрь күнү болжол менен саат 20.00дөрдө Түштүк магистраль менен Токтоналиев көчөсүнүн кесилишинде болгон. Аткаминер менен сүзгөн унаадагы мас жигиттердин ортосунда чыр чыккан да Жакыпбаев жыгылып, башы менен бордюрга тийген.
Маркумдун уулу Азиреттин айтымында, ушу тапта алар кысыктын күбөлөрүн издеп жатат.
"Ата-энем жол чыракта токтоп турса артынан Lexus сүзгөн. Атам унаасынан чыгып, тиги машинада эки мас жигит бар экенин көрөт. Апамдын айтымында, атам балдар соолуккандан кийин териштиребиз деп милиция чакырбоону сунуштаптыр. Бирок тигилерден документтерин берүүсүн талап кылган. Жигиттердин бири апамды алаксытып, экинчиси атам менен сүйлөшүп жатыптыр. Мындан улам апам атамдын жерге жыгылганын көрбөй калган", — деди ал.
Азирет 23-октябрь күнү Октябрь райондук соту экөөнү №1 тергөө абагына эки айга киргизгенин айтып берди. Маркумдун бүлөсү ушу тапта кармалган эки бала Маматназар Жакыпбаевди урган-урбаганын аныктоо үчүн окуянын күбөлөрүн издеп жатканы маалым болду.
Каргашага күбө болуп, же кандайдыр бир маалыматка ээ болгондор 0 555 029 002 телефону аркылуу байланышса болот.
