БИШКЕК, 22-окт. — Sputnik. "Кыргызаэронавигация" мамлекеттик ишканасынын башкы директорунун орун басары Маматназар Жакыпбаевдин өлүмү боюнча эки киши кармалды. Бул туурасында шаардык милициянын маалымат кызматынан кабарлашты.
21-октябрь күнү саат 20.00дөр чамасында Түштүк магистраль менен Токтоналиев көчөсүнүн кесилишинде аткаминер башка автоунааны артынан келип сүзүп алган. Милиция ал жердеги жаакташуу урушка айланып кетип, Жакыпбаев бордюрга башы менен тийип каза болуп калгандыгын кабарлаган.
Аталган окуя боюнча кармалгандар убактылуу кармоо жайына киргизилип, Кылмыш кодексинин 104-беренеси (Саламаттыкка атайылап оор залал келтирүү) менен иш козголгон.
