БИШКЕК, 15-окт. — Sputnik. Казакстанда кармалган экс-депутат Дамирбек Асылбек уулуна карата козголгон кылмыш иши сотко өттү. Бул тууралуу Sputnik Кыргызстан агенттигине Алматы шаардык сотунун маалымат кызматы билдирди.
Иштин материалдары Алматыдагы эл аралык иштер боюнча атайылаштырылган райондор аралык сотко келип түшкөн. Ал эми Асылбек уулу кармалгандан тарта тергөө абагында жатат.
"Иш 9-октябрда келип түштү. Учурда өндүрүштө, кароо датасы белгилүү боло элек. Ал эми шектүүнүн камактагы мөөнөтү автоматтык түрдө узарды", — дешти соттон.
19 Бирдин айы 2018, 17:59
Эскерте кетсек, үстүбүздөгү жылдын 15-16-февралында Казакстандын Улуттук коопсуздук комитети Коррупцияга каршы күрөшүү улуттук бюросу менен биргеликте атайын операция жүргүзгөн. Натыйжада бажы постторунда иштеген уюшкан кылмыштуу топтун 8 мүчөсү жок кылынган. Ал эми колго түшүрүлгөндөрдүн арасында ЖК депутаты Дамирбек Асылбек уулу бар экени айтылган. Казакстандын ИИМи анын казак жарандыгы бар экенин айтып чыккан. Бул маалымат Борбордук шайлоо комиссиясынын коңшу өлкөнүн тийиштүү органдарына жиберген сурамынан кийин да тастыкталып, Дамирбек Асылбек уулу депутаттык мандаттан ажыратылган.
