Качандыр бир кезде баш мыйзамды жазып, маанилүү чечимдерди кабыл алып Кыргызстандын тагдырына түздөн-түз таасирин тийгизген айрым адамдар чоң креслодон кулап, түрмөгө отуруп калды. Sputnik Кыргызстан агенттиги ошол абактагы атка минерлердин абалына жана эмне менен алектенип жатканына кызыкты.
Өмүрбек Текебаев
"Ата-Мекен" партиясынын лидери Өмүрбек Текебаев Мирсаид Миррахимов атындагы улуттук кардиология борборунда бир жарым ай дарыланып, 14-сентябрда кайра Бишкектеги №47 түзөтүү колониясына кайтарылган. Адвокаты Искен Афиджанов учурда анын ден соолугу канааттандыраарлык экенин билдирди.
"Өмүрбек Чиркешович абакта китеп окуп, иштеп да жатат. Алдыдагы парламенттик шайлоого даярданып, партиянын программасын жана стратегияларын түзүүдө. Мындан сырткары, мыйзамга өзгөртүүлөрдү жана мыйзам долбоорлорун жазууда. Спорт зал жок, өзүнүн бөлмөсүндө чакан машыгуу жайы бар. Ооруканага жатканга чейин айына эки жолу үй-бүлөсү менен кезигип турган", — деди Афиджанов.
Садыр Жапаров
Бийлик өкүлүн барымтага алган деп кармалган экс-депутат Садыр Жапаров Молдовановкадагы №1 түзөтүү абагында жаза мөөнөтүн өтөп жатат. Анын жактоочусу Шарабидин Токтосунов экс-депутат өлкөнү өнүктүрүү планын жазып жатканын айтты.
"Садыр Жапаров менен 11-сентябрда жолуктум. Ал түрмөнүн ичинде мечитке каттап, беш убак намазын калтырбай окуп жатат. Спорт менен машыгып, футбол да ойношот экен. Китептерди көп окуйт. Канткенде Кыргызстандын экономикасын өнүктүрүп, бирөөнүн буйругу эмес мыйзамга таянып иш жасай турган коом курабыз деп ой толгоп, пландарды жазууда. "Кумтөр" маселесине дагы деле кейип отурат. Ден соолугу жакшы. Бирок мыйзамсыз камалганына ызасы чексиз. Туугандары менен жолугуп турат", — деди Токтосунов.
Сапар Исаков
Ал эми мурдагы премьер-министр Сапар Исаковдун адвокаты Нурбек Токтакунов ал дагы деле спорт менен машыгуусун улантып, тил үйрөнүп жатканын белгиледи.
"Мурда түрмөгө түшкөндөр "оорудум" деп чыкчу эмес беле. Ал антпей өзүн катуу кармап жүрөт. Саламаттыгына даттанган жок. Абактын ичиндеги спорт залда машыгууда. Көбүнчө кыргызча китептерди жеткирип берүүнү суранууда. Андан тышкары, англис тилин өздөштүрүп жатат", — деди адвокат.
Осмонбек Артыкбаев
Бишкек ТЭЦтин айланасындагы чыр боюнча кармалган мурдагы энергетика министри, депутат Осмонбек Артыкбаевдин авдокаты Айжан Орозакунованын айтымында, анын саламаттыгы күндөн-күнгө начарлап жатат. Ал УКМКнын убактылуу кармоочу жайына киргизилген.
Деген менен УКМКнын төрагасы Идрис Кадыркулов Артыкбаев жакында кардиологияга үч жумадай жатып, жүрөгүнө операция жасатып, реабилитация курсунан өткөндөн кийин абалы турукташканын маалымдаган.
Кубанычбек Кулматов жана Албек Ибраимов
Тергөө абагында жаткан Бажы кызматынын мурдагы жетекчиси Кубанычбек Кулматов менен Бишкектин экс-мэри Албек Ибраимовдун жактоочусу Сергей Слесаров экөөнүн тең ден соолугу жакшы экенин кабарлады.
"Жакталуучуларым тергөө абагында болгондуктан көп нерселер чектелүү. Компьютер, телефон жок. Болгону китеп окуганга мүмкүнчүлүк берилген. Жумасына эки-үч жолу сейилдөөгө чыгып турат. Кулматов камалгандан бери жубайы менен да жолугууга уруксат бериле элек. Албек Ибраимов болсо үй-бүлөсү менен жолугуп турат", — деди жактоочу.
Жантөрө Сатыбалдиев
Улуттук коопсуздук мамлекеттик комитетинин тергөө абагында кармалып турган Жантөрө Сатыбалдиев медициналык кароодо жүрүп, 18-сентябрь күнү кардиологияга өзүнүн дарыгеринин көзөмөлү менен ооруканага жаткырылды. Бул туурасында УКМКнын төрагасы Идрис Кадыркулов Жогорку Кеңеште депутаттардын суроолоруна жооп берип жатып кабарлады.
Саясатчы ага чейин абакта эмне менен алектенип отурганын жактоочусу Марат Эшперов кабарлоодон баш тартты. Ал Сатыбалдиевдин өзү менен жолугуп маалымат берүүгө уруксат алгандан кийин гана айта аларын билдирди.
