БИШКЕК, 20-сен. — Sputnik. "Кыргызстан" фракциясынан депутат Талайбек Масабиров учурда Кыргызстан канча мамлекет менен аба каттамын жолго салуу боюнча документке кол койгонуна кызыкты.
Бул маселе боюнча парламентке чакырылгандар учурда аба каттамдарын жолго коюу үчүн 28 мамлекет менен документке кол коюлганын, Катар мамлекети 29чу болорун айтты. Бирок учурда тогуз мамлекет менен гана аба байланыштары иштеп жатканын белгилешти.
"28 өлкөнүн ичинде Европа мамлекеттери да бар, бирок аларга биздин учактар кире албайт", — деди чакырылгандар.
Депутат бул жаатта иш алып баруу керектигин, Кыргызстандын учактарын кара тизмеден чыгаруу зарылдыгын белгиледи.
Транспорт жана жолдор министринин орун басары Жеңишбек Ногойбаев авиабилеттердин баасы 4000 сомдон ашпаш керек деген келишим бар экенин билдирди. Андан сырткары, билеттин баасы 4000 сомдон жогорулап кетти делген маалыматтарды изилдей келгенде далилдер болбой жатканын кошумчалады.
"Жол жабылып калган учурда Бишкек — Ош багыты боюнча билеттин баасын 3000 сомдон ашырбаш керек деген келишим бар. Учурда аны авиакомпаниялар аткарып жатат", — деди ал.
Депутат Максат Сабиров ("Республика — Ата Журт" фракциясы) Кыргызстанда эл аралык маанидеги канча аэропорт бар экенин сурады.
"Манас" аэропортунун өкүлү эл аралык маанидеги беш, жергиликтүү алты аэропорт бар экенин маалымдады.
Бирок эл аралык деңгээлде делген Баткен менен Каракол аэропортторуна азыр каттамдар жок экенин кошумчалады.
