Чеберлерге бүгүнкү күндө жүн жетпей калууда. Бул тууралуу Динара Чочунбаева Sputnik Кыргызстан радиосунун "Ачык кеп" программасында маек куруп жатып билдирди.
Анын айтымында, жергиликтүү тургундар койдун жүнүн кыркыла элегинде эле чет элдиктерге сатып жиберип, кыргыз чеберлерине жүн калбай калат.
"Кол өнөрчүлөрдүн басымдуу бөлүгү айыл жергесинде жашайт. Ошентсе да жергиликтүү тургундар койлордун жүнүн кыркыла электе сатып салып, чеберлерге жүн жетпей калууда. Мурда жылына койлорду эки жолу кыркса, ал ами азыр бир эле жолу кыркып, сапаты өтө төмөндөп кеткен. Айрым чеберлер жүн жоктугунан улам чет өлкөдөн алдырууга аргасыз. Эч нерсеге жарабаган жүн өрттөлүп жаткан учурда сапаттуу жүнгө муктаж болуп жатабыз", — деди Чочунбаева.
Ал мындан сырткары чеберлер өкмөттөн насыя алууну суранып келгенин, мындан эч кандай жыйынтык болбой жатканын кошумчалады.
