БИШКЕК, 2-авг. — Sputnik. Алматы шаарынын тургуну 4 жаштагы Мухаммед аттуу уулун сабаганын моюндады. Ага чейин полиция баланы автоунаа коюп кетти деп ойлогон. Бул тууралуу Sputnik Казакстан маалымат агенттиги билдирди.
Жолдон баланы коюп кеткен айдоочу аны жука төшөккө ороп, жолго таштап кетти делген маалымат 16-июлда полицияга түшкөн. Атасы да арыз менен аймактык милицияга кайрылган. Ал жумушка чыкканда уулу артынан ээрчип алганын байкабай калганын, кырсык тууралуу социалдык тармактан билгенин айткан. Ал киши ЖМК аркылуу кайрылып, жол кырсыгынын күбөлөрү болсо үн катууну суранган.
Төрт жашар Мухаммед табылары менен дароо ооруканага оор абалда алып келинип, операция жасалган.
Баланын атасы 1-августта уулу тил албаганда таш менен чаап жибергенин моюнга алып, коомчулук менен полицияны алдаганын айткан.
Дарыгерлер баланын саламаттыгы жакшырганын айтып, учурда оң колу менен бутун кыймылдатканга жарап калганын айтышты. Бөбөктүн жылмайып баштагандыгын кошумчалашкан.
Азыр бөбөктүн өмүрүнө эч кандай коркунуч болбогону менен калыбына келтирүү аракеттери качан аяктарын ак халатчандар так айта алышпастыгын билдиришти.
Алматы шаарынын балдарга көрсөтүлүүчү Тез жардам кызматы боюнча ооруканасынын нейрохирург-дарыгери Николай Дьяченко ушул тапта дагы бир операция жасала тургандыгын айтты.
"Бир же эки айбы, же жарым жылбы так айта албайм. Баланын баш сөөгүнө дагы пластика операциясы жасалат. Анын сөөгү сактап койдук. Бул ыкмасын биздин клиника көп жыл мурда иштеп чыккан. Тигилген гана тактар болбосо баш кадимкидей көрүнөт", — деди Дьяченко.
Тергөө амалдары улантылууда.
