БИШКЕК, 2-авг. — Sputnik. Бүгүн "Тибиртке" рубрикасында дал ушул теманы козгойбуз, сөздөрдү чечмелегенге филолог Ишенбек Султаналиев менен балдар акыны Токтосун Самудинов жардам берди.
Эскерте кетчү учур, бул жерде белгиленген жаш курак бир-эки жылга жылышы да мүмкүн.
Бала — төрөлгөндөн тарта 13 жашка чейин, башкача айтканда биринчи мүчөл жашы.
Ымыркай, наристе — төрөлгөндөн 2-3 жашка чейин;
Бөбөк — 7 жашка чейинки курак;
Жеткинчек — 7 жаштан 10 жашка чейин (кызга да, уул балага тиешелүү);
Тестиер — 10 жаштан 12 жашка чейин (кызга да, уул балага тиешелүү);
Өспүрүм — 12ден 16 жашка чейин (кызга да, уул балага да айтылат);
Улан — 17 жаштан 20 жашка чейин;
Жигит — 20 жаштан 35 жашка чейин;
Киши — 37 жаштан 49 жашка чейин;
Кыргыз элинде эр ортону элүү жаш деген сөз бар, бул адам жарым өмүрүн жашап, улуулукка баш кое баштаган учур.
Эркек — бардык куракта айтылат;
Уул бала — эркек деген сөздүн синоними. Кыргызда жеңе кайнисин өмүрү өткөнчө "уул бала" деп тергеген. Түрк тилдүү элдердин айрымдары жаш баланы уул бала дейт.
Мырза — өз курагынан эрте эле кыргыздардын бардык жашоо багытын билген, оозунда сөзү бар адам.
Эр — баатыр мүнөз, ички-тышкы маселелерди чече алган, оозунда сөзү, колунда күчү бар, тарыхты билген жигит.
Абышка — улгайган курак, кыргыздын каада-салтын орто деңгээлде билген адам;
Чал — улгайган курак, каада-салтты көп билбеген, накыл кептер боюнча түшүнүгү аз, чала сабат, өз түшүнүгүн бербеген адамды айтышкан.
Аксакал — улгайган курак, кыргыздын каада-салтын, тарых-санжырасын толук билип, айылды тескеген адам. Жамандык-жакшылыкта калайык калк аксакалдар менен кеңешкен.
Карыя — улгайган учурдан тарта көзү өткөнгө чейинки мезгил;
