БИШКЕК, 1-авг. — Sputnik. Дүйшөмбү күнү, 30-июлда, бет капчан белгисиз кишилер супермаркеттен 579 миң сомду уурдап кетишкенин Чүй ОИИБдин маалымат кызматы билдирди.
Ага ылайык, супермаркет Чүй облусунун Ново-Павловка айылында жайгашканы белгилүү болду.
"Белгисиз кишилер кароолчунун жоктугунан пайдаланып кампага кирип сейфти анча алыс эмес жерде жашырылган ачкыч менен ачып, акчаны алып из суутуп кеткен", — деп айтылат маалыматта.
Аталган факты боюнча уурулук беренеси менен кылмыш иши козголду. 19 жаштагы Б.А. жана 18 жаштагы У.Т. аттуу жарандар шектелип жатат. 18 жаштагы бала буга чейин да бейбашчылык боюнча кылмыш жоопкерчилигине тартылган. Кармалгандардын бири аталган супермаркетте кароолчу болуп иштегени аныкталды.
Тергөө амалдары жүрүп жатат.
