БИШКЕК, 16-июл. — Sputnik. Подмосковьеде эки мекендешин өлтүрүүгө шектелип кыргызстандык жаран кармалды. Бул тууралуу ИИМдин маалымат кызматынын жетекчиси Бакыт Сеитов билдирди.
Буга чейин Жуковский шаарында (Подмосковье) Москва дарыясынын жээгинен балыкчылар адамдын сөөгүн табышкан. Экинчисинин сөөгү да ошол эле жерден 7-январь күнү табылган. Экөө тең киши колдуу болгон. Алар 2017-жылдын 30-декабрынан бери изделип жаткан болчу.
Кийинчерээк укук коргоо органдары маркумдардын бири уюшкан кылмыштуу топтун мүчөсү катары ИИМдин каттоосунда турарын маалымдаган. Ал бир нече кылмыш ишине айыпталып, бирок тийиштүү далилдердин жетишсиздигинен иш токтотулуп калган.
"Эки мекендешин өлтүрүүгө шектелген кыргызстандык жаран Подмосковьеден кармалды", — деди Сеитов.
Учурда ал Москванын убактылуу кармоочу жайына киргизилди. Сейитовдун айтымында, кармалган киши дагы уюшкан кылмыштуу топтун мүчөсү катары ИИМдин каттоосунда турат.
