БИШКЕК, 1-июн. — Sputnik. "Кыргыздипсервис" мамлекеттик ишканасы акыркы кезде Бишкектеги Кытай элчилиги жайгашкан жердин айланасындагы түрдүү кабарлардан улам билдирүү таратты.
Ага ылайык, Кытайдын Кыргызстандагы элчилиги жайгашкан жер (Бишкек шаарынын түштүк-батыш тарабында) Бишкек мэриясынын 2003-жылы 2-октябрдагы №712 токтомунун негизинде элчиликтин имарат комплексин куруу үчүн 49 жылга ижарага берилген.
Ошондой эле Кытай тарап дагы ушундай эле мөөнөт менен кыргыз тарапка Пекиндин борборунан 25 сотых жер тилкесин бермей болду. Андан сырткары, кытай тарап бул жерге Кыргызстандын элчилигинин имаратын жана турак-жай куруп берүү убадасын берди.
"Пекин шаарынын борборунда бир чарчы метр жердин баасы 2500-3800 доллар турса, Бишкекте салыштырмалуу арзан. Башкача айтканда, Пекинде 25 сотых жердин баасы 9,5 миллион доллар турат", — деп айтылат маалыматта.
Кыргызстандын президенти Сооронбай Жээнбеков 6-8-июнда Кытайга расмий иш-сапары менен барат.
