БИШКЕК, 29-май — Sputnik. Ала качууга туш болуп бычакталган кыздын денесинен кыз-жигиттин атынын баш тамгасы жазылганы аныкталган жок. Бул туурасында Чүй ОИИББдин башчысы Нурлан Сарчаев маалымат жыйында билдирди.
Анын айтымында, эки киши менен кызды Жайыл райондук милициясына жол инспектору алып келген. Ал ыкчам нөөмөтчүгө маалымат берип жатканда кабылдамада жалгыз болчу.
Бул учурда сыртта короодо турган эки кишини бир кызматкер көзөмөлдөп турган.
"Милиционер дарбаза жакта ызы-чуу угулганда аны караганы кеткен. Ошол учурда шектүү машинадан бычак алып кабылдамага кирип барган. Кыйкырыктан улам кызматкерлер 20-25 секунддун ичинде эшикти талкалап киришкен. Анда кыз үч жеринен бычак жеп жаткан. Бала өзүн көкүрөк тушка төрт жолу бычак менен урган", — деди Сарчаев.
Эскерте кетсек, 27-май күнү 29 жаштагы киши Чүй облусуна караштуу Жайыл районунун ички иштер бөлүмүндө ала качып алган кызын бычактап, кийин өзүнө да кол салган. Кыз алган жараатынан улам каза болуп, ал эми кылмышка шектелген киши ооруканада жатат.
Буга чейин жергиликтүү ЖМКлар маркумдун туугандарына таянуу менен кыздын денеси тилинип, жигит экөөнүн ысымынын баш тамгалары жазылганын билдиришкен.
