Кубанычбек Кулматовдун кандай мүлкү бар? Декларациядагы маалымат

БИШКЕК, 25-май — Sputnik. Бишкектин экс-мэри, Мамлекеттик бажы кызматынын мурдагы жетекчиси Кубанычбек Кулматовдун кирешеси тууралуу декларациядагы маалыматына караганда, ал бир батирге ээлик кылат.

Эске салсак, бүгүн анын мүлкү камакка алынганы тууралуу маалымат тараган.

Декларацияда 2015 жана 2016-жылдардагы маалымат көрсөтүлгөн. Ага ылайык, мурдагы жетекчинин унаасы жана кайсы бир компанияларда үлүшү жок. Анын атына болгону аянты 64 чарчы метрлик батир катталган.

2015-жылы Кулматов 813 миң сом киреше көргөн. Бирок ал кайдан келгени көрсөтүлгөн эмес.

Ал эми 2016-жылы негизги кызмат ордунан 829 миң сом айлык алганы айтылган.

Ал эми анын тууганы аянты 100,7 чарчы метрге жеткен батир жана бир гаражга ээлик кылат. Ал адам 2015-жылы 2 миллион сомдон ашыгыраак киреше тапканы айтылса, 2016-жылы эч кандай сумма көрсөтүлгөн эмес.

Ошол эле тууганынын үч жыл мурда эки унаасы болсо, эки жыл мурда үчөө болуп калган. Анын мүлкү камакка алынган жок.

Эске салсак, Кулматовго Кылмыш жаза кодексинин 303-беренесинин 1-бөлүмү (Коррупция) боюнча айып талынган. Аны коррупцияга күнөөлөп жатышат.

УКМКнын маалыматына караганда, Кулматов 2014-жылы Бишкек шаарынын мэри болуп турганда ТBEA тарабынан эки мектептин курулушуна берилген гранттык каражаттын 2 миллион долларын мыйзамсыз пайдаланган. Ал каражат аймактарга эки мектеп салууга берилсе, Кулматов аны өкмөттөн мэриянын карамагына өткөртүп, "Калыс-Ордо" жаңы конушуна мектеп салуу шылтоосу менен бөлдүртүп алганы айтылган.

Кулматов өзү ал каражаттын бир тыйынын да албаганын, эмне себептен аны күнөөлөп жатканына түшүнбөгөнүн айткан.

Буга чейин Кулматов УКМКга эки ирет суракка чакырылып, өлкө аймагынан сыртка чыгуусуна тыюу салынган.