БИШКЕК, 19-май — Sputnik. Кыргызстандык мушкер Бусурманкул Абдубаит уулу жаракат алганына байланыштуу М-1 Global уюмунун Challenge 92 турнирине катышпай турган болду. Бул тууралуу Sputnik Кыргызстан маалылымат агенттигине мушкердин менеджери Айбек Мусаев билдирди.
Анда Бусурманкул Абдубаит уулу 66 килограмм салмак ченинде германиялык Саба Болаги менен беттеше тургандыгы айтылган.
Менеджер Айбек Мусаевдин айтымында, Абдубаит уулунун ордуна дагы бир кыргыз спортчусунун кармашы сүйлөшүлүп жатат.
"Бусурманкул машыгууларынын биринде мойнунан жаракат алып калгандыгына байланыштуу мелдештен четтетилди. Анын ордуна Азиз Сатыбалдиев аттуу мушкер тууралуу М-1 Global уюмуна маалымат жөнөткөнбүз. Жакынкы күндөрү расмий кабар беришет", — деди Мусаев.
Эске сала кетсек, Абдубаит уулу М-1 Global спорттук уюму менен эки жылга келишим түзгөн. Бул спортчунун келишимден кийинки экинчи беттеши болмок.
Биринчи кармашында М-1 Global уюмунун мурдагы чемпиону Максим Дивничти утуп алган.
