Кечээ өлкөдө жана ааламда болгон окуяларды Бурадарга тизмектедик.
Жамгыр, кар. Бүгүн Бишкек шаары менен Ош калаасында мезгил-мезгили менен жамгыр жаап, 17…19 градус жылуу болот. Чүй, Ысык-Көл, Нарын облустарынын тоо этектеринде өткүн өтүп, тоолуу райондорунда кар жаашы күтүлөт. Бул тууралуу Кыргызгидромет билдирди.
Жакында мектепти таштап, чоң турмушка аттанам деген балдар-кыздардын акыркы коңгуроодо банкет өткөрүүсүнө министрлик тыюу салды. Кайда-аан… делбектеп даярданып жаткан балдар менен ата-энелерди эч ким токтото албайт го.
Тартип демекчи, Бишкекте 20дай киши милицияны жакалап, асманга ок атылды. Мобилдик батальондун баласын кесиптештери ызылдаган топтон араң сууруп кетиптир…
Алы жетпеген акыретчил. Милиционерлерди эмес, жол салгандарды ушинтип акесин тааныткандар болду бекен? Жаның кашаят. Бишкектин жаңы жасалган жолдордун сапатына шаар тургундарынын ичи чыкпай нааразы болуп келет. Айтор, алы жетпеген акыретчил болгон тейде отурабыз…
Айбат көрсөттү. Кичинекей Кыргызстандагы саясат кайрадан масштабын кеңейте баштагандай. Кечээ кечинде мэр Албек Ибраимов отставкага кетпей турганын айтса, ал эми экс-премьер министр Сапар Исаковду УКМК суракка чакырды.
Уккандан уга элегиң көп… Акыркы кезде кыргызстандыктардын оозунан "Райым миллион" деген кеп түшпөй калган. Ошол Райым Матраимов өкмөттөн эмне талап кылып жатыптыр дебейсизби?…Аны бул жерден окуп алыңыз. Кызык эле мезгилде жашап жатабыз…
Саясат саясаты менен, Бишкекке Алыкул айдаган атактуу "Победалар" келиптир. Тарыхтын бир бөлүгүн өзүнө сиңирген темир тулпарлар…
Валюта наркы. Сомдун баасы долларга карата орто эсеп менен 68.74 (сатып алуу) жана 68.98 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгү май 41.80 сом, АИ-95 үлгүсүндөгү бензин 44.50 сом, ал эми дизель майы 42.50 сомдон сатылууда.
Соңку сөз. Иш күнүңүздөр ийгиликтүү өтсүн. Аманчылык каалап Нургүл Максутова.
