БИШКЕК, 23-мар. — Sputnik. Кыргызстан Бириккен Араб эмирлигиндеги "Fashunity exhibition 2018" эл аралык көргөзмөгө катышып жатат. Аталган өлкөдөгү мекендештерибиз үчүнчү жолу өз күчү жана Кыргызстандын консулдугунун колдоосу менен бул фестивалда Кыргызстанды таанытууда. Бул туурасында мекендештер ынтымагынын активисти жана фестивалга катышуу боюнча демилгечилердин бири Кыял Өскөмбаева Дубай шаарынан билдирди.
"Иш-чара 22-марттан бери Дубай шаарындагы Аль Мамзар деп аталган эң чоң паркта өтүүдө. Фестивалдын быйылкы тематикасы — маданий баалуулуктар жана инновациялар. Америка Кошмо Штаттары, бир катар Европа, Араб мамлекеттери, Индия, Шри-Ланка, Колумбия, Пакистан, Кытай, КМШдан Кыргызстан, Казакстан — жалпы 20дан ашуун өлкө катышып, өз маданиятын, инновациялык жетишкендиктери менен тааныштырууда" — деди ал.
"Көчмөндөр оюндарына дүйнө элин кызыктыруу ниетинде быйыл аркан тартыш, бел күрөш, жоолук таштамай, беш таш, ордо, чүкө оюндары уюштурулат. Каалоочулар өз күчтөрүн сынай алышат, аларга атайын байгелер да сайылган", — деди Өскөмбаева.
Ошондой эле кыргыздын айрым каада-салттары да көрсөтүлүп, улуттук даамдар да меймандарга сунушталууда. Иш-чара эртең, 24-мартта, жыйынтыкталат.
Фестиваль Дубайдын башкаруучусу Мухаммед бин Рашид атындагы Ислам маданият борбору тарабынан жыл сайын өткөрүлүп келет. Былтыр "Fashunity exhibition 2017" сынагында Кыргызстан 1-орунга татып, акчалай сыйлыкка ээ болгон.
Консулдуктун расмий маалыматы боюнча БАЭде Кыргызстандын 3000ге чукул тегерегиндеги жараны бар.
