ДУБАЙ, 28-фев. — Sputnik. Бириккен Араб Эмирлигинде өткөн "Fashunity exhibition 2017" аттуу эл аралык фестивалдын жыйынтыгы менен кыргыз павильону биринчи орунду ээледи. Бул тууралуу журналист Айнагүл Сапарбек кызы Дубайдан билдирди.
Эскерте кетсек, көргөзмө-жарманке 23-25-февраль күндөрү өтүп, ага 20дан ашуун мамлекеттин өкүлдөрү катышкан.
Кыргыз павильонун уюштургандардын бири Хадижанын (Кыял Өскөнбаева) айтымында, баш байгеге 1000 дирхам берилген. Бул болжол менен 300 долларга чукул акчаны түзөт.
"Кыргызстанды бир топ эле тааныттык, азыр баары өлкө тууралуу, виза, билет жөнүндө сурап жатышат. Фестивалдын акыркы күнү Мухаммед бин Рашид атындагы Ислам маданият борборунун жетекчиси шейх Шайбани келип, кыргыз павильонуна кирип, көпкө чейин отуруп, даам сызды, биз менен сүйлөштү. Келгендердин баары тосуп алганыбыздан баштап, узатканга чейинки меймандостугубузду өзгөчө баалашты", — деди Хадижа.
Кыргызстан бул иш-чара экинчи ирет катышты. Ушундай эле нуктагы фестиваль учурда Ноорузга карата пландаштырылып жатат.
Консулдуктун расмий маалыматы боюнча, Бириккен Араб Эмирлигинде Кыргызстандын 3000ге чукул жараны жашайт.
