БИШКЕК, 20-мар. — Sputnik. 18-март күнү Россияда президенттик шайлоо өтүп, анда сегиз талапкер ат салышты. Өлкөнүн учурдагы жетекчиси Владимир Путин протоколдордун 98,92 пайызынын жыйынтыгы менен шайлоочулардын добушунун 76,66 пайызына ээ болду.
Кыргызстан илгертен эле Россия менен тыгыз алака түзүп келген. Эки өлкө стратегиялык өнөктөш болуп, ШКУ, ЖККУ жана ЕАЭБ сыяктуу ири уюмдарга мүчө. Sputnik Кыргызстан редакциясы алдыдагы алты жылда алака кандай болорун талдап чыкты. Россия президенти дал ушул мөөнөткө шайланат.
Путиндин шайланышы — бул туруктуулук жана жаңы ири долбоорлор
Саясат таануучу Марс Сариев Россия президентинин кайра шайланышы туруктуулукту камсыздайт деп эсептейт.
"Путин Кыргызстан үчүн тааныш өнөктөш, биздин республика менен түзүлгөн мамиленин бардык оош-кыйышын тереңден билет. Эгер башка талапкер шайланса эки тараптуу алаканы аңдап түшүнүүгө убакыт керектелмек. Путин Кыргызстанга карата кандай саясат жүргүзүү керектигин жакшы түшүнөт", — деди эксперт.
Эксперт Россия Кыргызстанга бир топ колдоо көрсөтүп келгенин айтып, эми жогорудагы кырдаалдан улам мындан да активдүү болушу керек деп эсептейт.
Учурдан пайдаланып экономиканы жакшыртуу керек
КРдин эмгек сиңирген экономисти Жумакадыр Акенеев Путиндин кайра шайланышы Россия менен болгон мамилени мурунку нукта өнүктүрүүгө шарт түзөрүн айтты.
"Анын Кыргызстанга ниети жакшы, демек дагы алты жыл жакшы мамиледе болобуз. Биздин экономикабыз 70 пайызга Россия менен байланыштуу, ал жактан күйүүчү май, металл, газ, жыгач келет, ал эми 700 миң мигрантыбыз өз үйүндө жүргөндөй жүрөт", — деди Акенеев.
"Колдоонун ичинде гуманитардык жардам, студенттерди окутуу, инвестиция сыяктуу көп нерсе бар. Менимче, биз жакынкы беш жылда экономикабызды көтөрүп, кийин ким президент болсо өнүп-өсө бергидей болушубуз керек", — деди Акенеев.
Кыргызстандын күчтүү болушуна Россия да муктаж
Тарых илимдеринин доктору, саясат таануучу Айнура Арзыматова Путин Россияны дүйнөлүк аренадагы мурунку ордуна алып келгенин айтып, россиялыктар дал ушул себептен ага артыкчылык бергенине токтолду.
"Путиндин жеңишке жетиши Кыргызстан үчүн жакшы жагдай. Россия Кыргызстанга калкан сыяктуу. Мындай тарапташтын болгону жакшы. Кыргызстандын күчтүү, туруктуу болушу Россияга да зарыл, дал ошондуктан көп кырдуу жардам көрсөтүп келет", — деди ал.
Кыргызстанда жашаган россиялыктар президенттик шайлоодо болуп көрбөгөндөй активдүүлүгү менен таң калтырды.
