БИШКЕК, 16-мар. — Sputnik. Алыкул Осмонов атындагы улуттук китепканада бүгүн Кыргыз эл акыны Эсенгул Ибраевдин 85 жылдыгына китеп-сүрөт көргөзмөсү жана эскерүү кечеси өткөрүлөт. Бул туурасында аталган китепканадан кабарлашты.
Иш-чара "… кымбат күндүн кызыктыгы ушунда, кыска жашап, узак баскан өмүр бар…" деп аталат.
Кыргыз Республикасынын эл акыны, КРдин маданиятына эмгек сиңирген ишмери, акын, сатирачы Эсенгул Ибраев кыргыз адабиятынын өнүгүшүнө, байышына өзүнүн салымын кошкон инсан.
Көргөзмөгө анын чыгармалары, ал жөнүндөгү китептер, газета-журналдык макалалар, фотодокументтер, цитаталар коюлат.
Ибраев 1933-жылы 16-мартта Тянь-Шань районундагы Чет-Нура айылында туулган. 1952-жылы Нарын шаарындагы педагогикалык окуу жайын бүтүрүп, 1952-1956-жылдары Кочкор, Нарын райондорунун мектептеринде мугалим, райондук комсомол комитеттеринде иштеген. 1961-жылы КМУнун журналистика бөлүмүн аяктап, 1961-1987-жылдарда республикалык саясий сатиралык "Чалкан" журналында адабий кызматкер, бөлүм башчы, жооптуу катчы, башкы редактордун орун басары, башкы редактор болуп иштеген.
Анын ырлары, сатиралары 1952-жылдан баштап жарыялана баштаган.
Ибраевдин калеминен абдан күчтүү ырлар жазылып, окурмандардын сүймөнчүлүгүнө ээ болгон ондогон поэтикалык китептер жаралды. Ал көп кырдуу таланттын ээси болгондуктан лирика, сатира, тамсил, фельетон, балдар ырлары, көркөм котормо өңдүү жанрларда иштеген.
"Насыят" аттуу ырлар жыйнагы үчүн ага 2006-жылы Токтогул атындагы мамлекеттик сыйлык ыйгарылган.
