БИШКЕК, 9-мар. — Sputnik. Бириккен күрөш уюму Бишкекте өткөн Азия чемпионатынын жыйынтыгы боюнча дүйнөнүн күчтүү балбандарынын рейтингин жарыялады.
Февраль айынын жыйынтыгы менен чыккан рейтингде өз салмак категориясы боюнча кыргызстандык Каныбек Жолчубеков менен Урмат Аматов биринчи орунга чыкты. Азия биринчилигинде Аматов 63 килограмм салмакка чейинкилер арасында күмүш тагынса, Жолчубеков 60 килограммга чейинкилер арасында коло медаль уткан.
Ал эми Азия чемпиону болгон Акжол Махмудов рейтингде экинчи орунду алып, анын финалдык беттештеги каршылашы казакстандык Демеу Жадраев биринчи орунга татыды.
Ал эми эркин күрөш боюнча кыргызстандык Муслим Евлоев 74 салмактыгылар арасында үчүнчү орунга татыды.
Рейтингде Казакстан менен Ирандын көпчүлүк спортчулары өз салмактары боюнча биринчиликке чыккан. Ал өлкөлөрдүн төрттөн балбаны биринчи орунга татыган.
