Өлтүрөйүн дедим эле, тирүү калды! Ошто балдызына бычак сайган киши кармалды

ОШ, 5-мар. — Sputnik. Ош шаарындагы борбордук базарда манты сатып отурган балдызына бычак сайды деген шек менен эркек киши колго түшүрүлдү. Бул тууралуу шаардык милициянын маалымат катчысы Замир Сыдыков билдирди.

Анын айтымында, окуя 4-март күнү саат 12.30дар чамасында калаадагы борбордук базарда болгон.

"29 жаштагы сатуучу аялга белгисиз эркек бычак сайып качып кеткен. Ыкчам издөө иш-аракеттеринин негизинде ошол эле базардын аймагынан 55 жаштагы К.Ж. аттуу киши кармалды", — деди Сыдыков.

Ал белгилегендей, шектүү жабырлануучунун жездеси болорун айтып, аны өлтүргүсү келгенин моюндаган.

"Сурак учурунда кармалган киши балдызы анын аялын ортого салып ири суммадагы каражатты башка бир адамга карызга алып бергенин билдирди. Кийин үчүнчү адам карызын төлөй албай калганына байланыштуу, жубайы Россияга барып иштөөгө аргасыз болгон. Буга ызаланган шектүү балдызын өлтүрүү үчүн бычак көтөрүп келгенин моюндап, "өлтүрөйүн дедим эле, бирок тирүү калды" деп өкүнүп отурду", — деди Сыдыков.

Учурда шектүүгө карата Кылмыш жаза кодексинин 234-беренеси (бейбаштык) боюнча кылмыш иши козголуп, убактылуу кармоочу жайга киргизилди.

Ал эми Ош облустук ооруканасынын дарыгерлери жабырлануучудан көп кан кеткенине карабастан өмүрүн сактап калууга мүмкүн болгонун маалымдашты.